Апетытныя бліночкі, духмянае печыва, сырнікі з малінамі і вішням, мяккія булачкі – такія пачастункі падрыхтавалі руплівыя бацькі, якія сабраліся у святочна прыбранай музычнай зале Любанскага дзіцячага садка, каб адзначыць Масленіцу, развітацца з Зімой і сустрэць Вясну. Адмысловы настрой стваралі народныя строі выхаванцаў і дарослых, радасна пагрымвалі упрыгожванні-каралі з абаранкаў, прыцягвалі увагу лялькі-Масленіцы зробленыя рукамі бацькоў.

         Завітала ў госці на свята Зіма каб загадкі загадаць, у снежкі пагуляць, развітацца ды свае правы і скарбонку з зернем Вясне перадаць. Вясна павіншавала са святам, абсыпала прысутных зернем, каб былі здаровымі ды багатымі, каб добры ураджай быў, у “Ручаёк” ды “Вяночак” пагуляла, ды раптам…прапала – не абышлося свята без выбрыкаў Бабы Ягі. Але калі з ёй пагулялі, на свята запрасілі - вярнула Баба Яга Вясну. А яшчэ на свяце Мядзведзя будзілі, прыпеўкі спявалі, у гульні гулялі, на прыканцы прыйшла Масленіца, запрасіла ў карагод, і танец са стужкамі “Кола” атрымаўся яркім і кранальным.

         Завяршылася свята частаваннем прысмакамі з гарбатам і вясёлым смехам задаволеных дзетак, усмешкамі ўдзельнікаў і гасцей.

         У адзін з калядных дзён выхаванцы і калектыў Любанскага дзіцячага сада сабраліся ў святочна прыбранай зале каля шчодра накрытага стала, які дапамаглі падрыхтаваць бацькі нашых дзетак, каб адзначыць Калядкі. Шмат гасцей завітала на свята. Дабрабыту і багатага ўраджаю жадала Каза, варажыла і весяліла ўсіх Цыганка, забаўляў Мядзведзь, спявалі, вадзілі карагоды, гулялі ў гульні калядоўшчыкі. Залівісты дзіцячы смех, сакавітая беларуская мова, народныя мелодыі поўнілі залу. А якое святочнае асяроддзе стваралі яркія народныя строі! Святу цесна было ў музычнай зале, і пайшлі калядоўшчыкі пад каляднай зоркай з песнямі і танцамі па вуліцах Любані.

         Спачатку завіталі ў адміністрацыю ААТ “Новая Любанія”. Гаспадары з цікавасцю слухалі песні, удзельнічалі ў гульнях, вадзілі карагоды. Потым калядоўшчыкі весялілі працаўнікоў Любанскага сельівыканкама. Жаданымі гасцямі былі самадзейныя артысты ва ўрачэбнай амбулаторыі. Напрыканцы крыху стомленыя, але бадзёрыя маленькія выступоўцы павіншавалі з Калядамі вучняў і калектыў сярэдняй школы. “Весяліла ўсіх яна - Каляда”, - падпявалі прысутныя.

         Святочны настрой, шчырыя ўсмешкі, незабыўныя ўражанні атрымалі і калядоўшчыкі, і тыя, хто іх сустракаў і цёпла вітаў. Накалядаваныя прысмакі ледзьве змесціліся ў немаленькі мех.

         Умее наш беларускі народ старанна і плённа працаваць, а яшчэ ўмее заўзята святкаваць. Чалавек, які памятае і шануе традыцыі, мае трывалую жыццёвую апору. У яго выхоўваецца пачуццё ўласнай годнасці, нацыянальнага гонару за прыналежшасць да беларускага народа.

1 чэрвеня ў нашай навучальнай установе быў арганізаваны тэматычны дзень, прысвечаны Міжнароднаму Дню абароны дзяцей, педагогі у гульнявой форме пазнаёмілі дзяцей з гісторыяй узнікнення свята, пагутарылі, ад чаго патрэбна абараняць дзяцей. Выхаванцы удзельнічалі ў музычным свяце: спявалі песні аб міры і сяброўстве, расказвалі вершы, танцавалі, гулялі. У госці да дзетак прыйшоў  Карлсан, і дзеці расказалі яму чаму і ад чаго патрэбна абараняць дзяцей. Таксама выхаванцы майстравалі фігуркі голуба ў тэхніцы арыгамі, складалі лісты для дзяцей з іншых краін з прапановай сябраваць. З асаблівым задавальненнем дзеткі малявалі крэйдай на асфальце. Амаль у кожным малюнку былі мама, тата і сонейка.

Напярэдадні свята Дня Незалежнасці для выхаванцаў Любанскага дзіцячага заўжды арганізоўваецца экскурсія да помніка загінуўшым воінам. Дзеці па даўняй традыцыі ўшанаваюць памяць герояў хвілінай маўчання і ўскладаюць кветкі да помніка. Дадзенае мерапрыемства накіравана на фарміраванне патрыятычнага выхавання ў дзяцей, пачуцця ўдзячнасці і гонару за вялікі подзвіг нашага народа.